13/12/2014 09:23

ANAMA-nın direktoru Nazim İsmayılov vəfat edib

Azərbaycan Ərazilərinin Minalardan Təmizlənməsi üzrə Milli Agentliyin (ANAMA) direktoru Nazim İsmayılov vəfat edib. “AzeriDefence”nin məlumatına görə, bu gün Təzəpir məscidində keçirilən vida mərasimindən sonra, mərhum ikinci Fəxri Xiyabanda dəfn olunub.Vida mərasimində mərhumun yaxınları, ANAMA-nın kollektivi, baş nazirin müavini Abid Şərifov, xarici işlər naziri Elmar Məmmədyarov, maliyyə naziri Samir Şərifov, mədəniyyət və turizm naziri Əbülfəz Qarayev, Dövlət Sərhəd Xidmətinin rəisi Elçin Quliyev, Dövlət Şəhərsalma və Arxitektura Komitəsinin sədri Abbas Ələsgərov, fövqəladə hallar nazirinin müavini Faiq Tağızadə, dövlət və hökumət rəsmiləri, diplomatlar, ictimaiyyət nümayəndələri iştirak ediblər.

Tədbirdə dövlət rəhbərliyi adından mərhumun yaxınlarına başsağlığı verilib.

Qeyd edək ki, N. İsmayılov 1944-cü ildə Bakı şəhərində anadan olub və Azərbaycan Politexnik İnstitutunu bitirib. İnşaatçı-mühəndis kimi əmək fəaliyyətinə başlayan N. İsmayılov bir çox dövlət qurumlarında, o cümlədən Sənaye Tikinti Nazirliyinin dəmir-beton trestində baş mühəndis, trest müdiri, Sənaye-Tikinti şirkətinin sədrinin birinci müavini vəzifələrində çalışıb. Texniki elmlər namizədi, Beynəlxalq Mühəndislik Akademiyasının akademik məsləhətçisi olub. O, “Şərəf nişanı ordeni”, “Tərəqqi” medalı, “Şöhrət” ordeni və Azərbaycanın Əməkdar Mühəndisi fəxri adı ilə təltif olunub. 2001-ci ildən ANAMA-nın direktoru olub. O, Azərbaycanda Milli humanitar minatəmizləmə potensialının yaradılmasında mühüm rol oynayıb.

Allah rəhmət eləsin!