27/12/2012 13:48

Azərbaycanın mühəndislərindən yeni havadan müdafiə sistemi

Azərbaycanın hərbi mühəndisləri tərəfindən yaxın məsafəli havadan müdafiə sistemi yaradılıb. Bu barədə “AzeriDefence” APA agentliyinə istinadən məlumat verib.

Motoatıcı bölmələrin havadan müdafiəsini təmin etmək məqsədilə yaradılmış sistemin artıq təcrübi nümunəsi hazırdır. Döyüş maşınlarının üzərinə yerləşdirilən bu sistem həm alçaq məsafədən uçan hədəflərə, həm də yerüstü hədəflərə qarşı tətbiq oluna biləcək.

Yeni havadan müdafiə sisteminə 2 lüləli, 14.5 mm çaplı pulemyot və 2 ədəd «Strela-1» tipli daşınan zenit-raketi kompleksi daxildir. Pulemyot və zenit-raket kompleksinin birləşdirildiyi qüllə 360 dərəcə bucaq altında fırlanaraq hədəfləri müşayiət edə bilir.

Paralel yerləşdirilmiş pulemyotlar 75 dərəcə, «Strela-1»kompleksi isə 85 dərəcə bucaq altında hədəflərə atəş açmaq imkanlarına malikdir.