10/07/2019 10:08

Bakıda NATO-nun ƏİK proqramı çərçivəsində işçi görüşü keçirilir

NATO-nun Tərəfdaşlıq İdarəsinin təşkilatçılığı ilə Bakıda Əməliyyat İmkanları Konsepsiyasının Qiymətləndirmə və Rəy proqramı (ƏİK) çərçivəsində Azərbaycanda ƏİK Məlumatlar Bazası proqram təminatının yenilənməsi üzrə işçi görüşü keçirilir.

Bu barədə “AzeriDefence”yə Müdafiə Nazirliyinin mətbiat xidmətindən məlumat verilib.

Tədbirin əsas məqsədi ƏİK Qüvvələr Birliyinə bəyan edilən bölmələrin qiymətləndirilməsində istifadə olunan ƏİK Məlumat bazası proqram təminatının yenilənməsi və təkmilləşdirilməsi üzrə yeni təkliflərin müzakirə olunmasıdır.

İyulun 11-dək davam edəcək tədbirdə 7 NATO və 6 tərəfdaş ölkə olmaqla 13 ölkədən 21 nümayəndə iştirak edir.

Qeyd edək ki, Azərbaycan 2004-cü ildən ƏİK proqramına qoşulub. Azərbaycan hazırda ƏİK Ortaq Qüvvələr Birliyinə bir tabor, bir kəşfiyyat bölüyü, HHQ-nin Mİ-17 helikopter cütlüyü və HDQ-nin Göyərtə Qrupunu bəyan edib.