12/09/2019 09:51

DSX Çevik Hərəkət Qüvvələrinin hərbi hissəsində idman kompleksi istifadəyə verilib

Dövlət Sərhəd Xidmətinin (DSX) Çevik Hərəkət Qüvvələrinin Yevlax şəhərində yerləşən hərbi yeni idman kompleksi istifadəyə verilib.

Bu barədə “AzeriDefence”yə DSX-nin mətbuat mərkəzindən məlumat verilib.

İdman kompleksinin açılış mərasimində iştirak edən DSX-nin Çevik Hərəkət Qüvvələrinin komandanı general-leytenant Ehram Hacıyev Dövlət Sərhəd Xidmətinin rəisi general-polkovnik Elçin Quliyevin təbrikini şəxsi heyətə çatdırıb. Prezident İlham Əliyevin Ali Baş Komandanlığı altında hərbi qulluqçular üçün zəruri xidməti və yaşayış səviyyəsinin təmin edilməsi, o cümlədən bədən tərbiyəsi və fiziki hazırlıqla məşğul olmaları üçün lazımi şəraitin yaradılması istiqamətində önəmli tədbirlərin görülməsi, bu sırada “Sərhədçi” idman olimpiya mərkəzinin, həmçinin bütün sərhəd dəstələrinin və digər hərbi hissələrin nəzdində yaradılmış idman komplekslərinin fəaliyyətinə böyük önəm verilməsi qeyd olunub.

Yeni inşa edilmiş idman kompleksində çevikliyi və dözümlüyü artırmaq üçün ən müasir avadanlıqlarla təchiz edilmiş trenajor zalı, stolüstü tenis və bilyard zalı, voleybol, basketbol və mini futbol oyunlarının keçirilməsi üçün nəzərdə tutulmuş böyük idman zalı mövcuddur. İdman kompleksində həmçinin tamaşaçılar üçün tribuna, idmançılar üçün rahat geyinib-soyunma və yuyunma otaqları, kompleksin fəaliyyətini təmin etmək üçün zəruri avadanlıqlarla təchiz edilmiş xidməti otaqlar da istifadəyə verilib.

İdman kompleksinə baxış keçirildikdən sonra çevik bölmələr nümunəvi çıxışlarını təqdim ediblər.