16/11/2017 19:17

General Kərim Kərimovun xatirəsinə həsr olunmuş tədbir keçirilib

Azərbaycan Milli Elmlər Akademiyasının (AMEA) və Azərbaycan Respublikası Müdafiə Sənayesi Nazirliyinin Milli Aerokosmik Agentliyinin birgə təşkilatçılığı ilə görkəmli alim və hərbi xadim, Sosialist Əməyi Qəhrəmanı, Dövlət mükafatları laureatı, AMEA-nın fəxri üzvü, general-leytenant Kərim Kərimovun anadan olmasının 100 illiyinə həsr edilən tədbir keçirilib.

“AzeriDefence”nin məlumatına görə, tədbiri açan AMEA-nın prezidenti, akademik Akif Əlizadə tədbirin Prezident İlham Əliyevin “Kərim Kərimovun 100 illik yubileyinin keçirilməsi haqqında” 30 yanvar 2017-ci il tarixli Sərəncamına əsasən təşkil olunduğunu bildirib.

Tədbirdə qeyd edilib ki, bütün ömrünü kosmik raket texnikasının inkişafına həsr etmiş Kərim Kərimovun fəaliyyəti XX əsrdə kosmosun fəth olunması tarixinin ayrılmaz hissəsini təşkil edir. İyirmi beş il ərzində Kosmik Uçuşlar üzrə Dövlət Komissiyasına başçılıq etmiş Kərim Kərimovun adı keçmiş SSRİ-də kosmosun öyrənilməsi sahəsində bir çox nadir elmi-texniki layihələrin həyata keçirilməsi ilə sıx bağlı olub.

Bildirilib ki, bütün əmək fəaliyyətini Moskvada həyata keçirən Kərim Kərimov doğma vətəni Azərbaycan ilə əlaqələrini kəsməyib, respublikanın elmi mərkəzləri, xüsusilə Azərbaycan Milli Aerokosmik Agentliyinin işləri ilə həmişə maraqlanıb, öz dəyərli tövsiyə və məsləhətləri ilə onlara kömək edib. Kərim Kərimov Azərbaycan Respublikasının ali mükafatı – “Şöhrət” ordeni ilə təltif edilib.

Çıxış edən “Azərkosmos” ASC-nin İdarə Heyətinin sədri Rəşad Nəbiyev, rusiyalı kosmonavt Oleq Kotov, akademik Roald Saqdeyev alimin kosmik raket texnikasının inkişafındakı misilsiz xidmətlərindən söz açdılar və onunla bağlı xatirələrini bölüşüblər.

Mərasimdə Müdafiə Sənayesi Nazirliyinin Milli Aerokosmik Agentliyinin direktor müavini, professor Tofiq Süleymanov Kərim Kərimovun həyat və fəaliyyəti ilə bağlı geniş məlumat verib.

Tədbirin sonunda  görkəmli alimin xatirəsinə həsr olunan “Yüksəliş” sənədli filmi nümayiş olunub.