18/11/2017 19:17

Komanda-qərargah hərb oyunları Naxçıvan Əlahiddə Ümumqoşun Orduda davam edir – VİDEO

Azərbaycan Silahlı Qüvvələrinin bütün qoşun növlərinin cəlb edildiyi komanda-qərargah hərb oyunlarının birinci – hazırlıq mərhələsi Naxçıvan Qarnizonunun qoşunlarında başa çatdırılaraq ikinci mərhələyə start verilib.

Bu barədə “AzeriDefence”yə Müdafiə Nazirliyinin mətbuat xidmətindən məlumat verilib.

Əlahiddə Ümumqoşun Ordunun birbaşa və əməliyyat tabeliyində olan birləşmə və hissələrin qərargahlarında komanda-qərargah hərb oyunlarına hazırlıq planına uyğun olaraq bir sıra tədbirlər həyata keçirilib.

Zabitlərin, qərargahların və ümumilikdə qoşunların hərb oyununda iştirakının yüksək səviyyədə təşkil edilməsi məqsədilə müxtəlif kateqoriyadan olan zabitlərlə toplantı və mühazirələr, eləcə də qoşunların idarə olunmasında komandir heyətinin praktiki vərdişlərinin təkmilləşdirilməsi üçün radioməşqlər keçirilib.

Yeni istismara verilmiş Təlim və Tədris Mərkəzinin Hərb Oyunları Mərkəzində qarşıda duran tapşırıqların kompüter üzərində məşqi icra edilərək fəaliyyətlərin nəticələri təhlil edilib.

Komanda-qərargah hərb oyunları noyabrın 20-dək davam edəcək.